El Seneschal, Alexander Davis, oxhi emestev'iensa proclamaziun "reconéiç[ind] las comtribuziuns" dels individuais qi -- in reacziun àl veþaviör del regeu vienstempmint, Rôibeard -- zespartevent el Regipäts à formarh la Republica Talossan. La proclamaziun ariveva in respuns à'iensa analüçaziun és ün criticamaintsch suvlonc dal cünstavalità corentic del Regipäts par el ex-Sheneschal, és citaxhien corentic dal Republica, Gödafrïeu Válcadác’h.
Din tres posts sür Wittenberg, Válcadác’h gratülescheva Davis per sieu apüntamaintsch àl Seneschalsqab, mas procedeva à façarh üna zefençù paßiunar dal posiziun republican, és à condemnarh el Regipäts per sieu "silençù" és per sieu "veneraziun" del Legeu Orgänic.
Avant o emesteva la proclamaziun, Davis criticeva la Republica à c'hauça da sieu "vitriol istuporat" à lo. Com'evri, o noteva qe "[las republicaes sè] zespärts füt xhustificat," és qe "neviens en zisputa."
Din la proclamaziun, o nomineva l'exodüs "üna traxhedà," mas refuçeva imoblideiramint da façarh eð'à ziscutarh iñen compromiçù över el Legeu Orgänic eða la monarc'hà. El Prüm Ministreu parleva da sieu auxheziun àl Doctrinâ Schivâ (ün Legeu dal Republica qe resquira l'ablaziun d'acestilor elemints del reitxim del Regipäts avant las negociaziuns seriösen da "reviennind" povent paßarh), zepictind dels pärtsilor come "apartì odiösen."
O plana à cambiarh la meþoda da reattainarh la citaxhienità del Regipäts, svo að ça serent "pü lißeu, és mïus niderind."
Àl concluziun dal proclamaziun, Davis façev'iensa invitaziun simpil: "viensiçetz avetz üns, és com'acest noi embù serent pü läxhir."
No comments:
Post a Comment